Kum 2 vel chhunga mi 22,490-te MR bill MSHCS-in Rs 6,31,250,126 a la ba mek 'Hriatthiam theihah kan ngai lo' - MPCC

Mizoram Pradesh Congress Committee (MPCC) Media department chuan, sorkar kum 2021-22 leh 2022-23 chhunga damlo bill, Mizoram State Health Care Scheme-a lutte a vaia la pek loh vek a nih thu leh kum hnih dáwn damlo bill pek a ni lo chu hriatthiam theiha an ngai loh thu an tarlang a; Congress party-in sorkarna a chan chuan mipui thlamuanpui thamin healthcare scheme an kalpui dawn tih an puang.

MPCC-in RTI Act hmanga information an dil chhuah an tarlan danin, MSHCS hnuaia damlo bill thehluh tawh Mizoram sorkarin November 30, 2022 dinhmun anga a batsak zat chu Rs 6,31,250,126 a ni a, mi 22,490-te MR bill a ni. MR bil, batsak mek mihring zat hi sorkar kum kal meka 2022-23 chhunga MSHCS-a inziak lut zat 39,505 aṭangin 56% chuang a tling.

RTI Act hmanga zawhna chhannaa a lan danin, financial year 2020-21 chhunga bill lut aṭangin mi 662-te bill Rs 1,96,56,101 pek loh a la awm a; kum 2021-22 leh 2022-23 chhunga bill lut zawng zawng la pek loh vek a ni bawk.

RTI Act chhannaa a lan danin, kum 2021-22 leh 2022-23 financial year-a damlo bill-te pek a la ni lo hrim hrim tih tarlangin, "Kum hnih dáwn damlo bill pek a ni lo hi hriatthiam theihah kan ngai lo," an ti a; MR bill pek loh vangin damdawia inenkawl chhunzawm thei lo mi tam tak an awm niin an sawi.

MSHCS-a inziak lut damlote'n bill an hmuh theih loh chhan ber chu sum enkawltu chief minister Zoramthanga'n damlo bill pek a ngaih pawimawh loh vanga an ngaih thu sawiin MPCC chuan, "A duhsak zawng contractor mi tlemtête tan bill lakah harsatna a awm ngai loh laia damlo 22,490-te MR bill tun thlenga MNF sorkarin a la pe thei lo hi mipui hriselna a ngaihthah vang a ni," an ti.

Congress party chuan, Zoramthanga kaihhruai MNF sorkarin mipui hriselna a ngaihthah ṭhin tih an sorkar hmasak (1998-2008) laia Referral Hospital an tihchhiat dan aṭangin a chiang tawh niin an sawi a, "Tunah chhungkaw tam takin an thlamuanpui ṭhin healthcare an tichhe leh mek a ni," an ti a; mipuiin an rin tawh loh avangin MSHCS-a inziak lut pawh chhungkaw 39,505 chauh an ni tawh tih an tarlang.

MPCC chuan, Congress party a sorkarin mipui hriselna an ngai pawimawh ṭhin nia sawiin, "Referral Hospital tluchhe tawh pawh a siamṭha a, medical college changtlung takah a din a, ṭhalai tam takin MBBS an zir theih phah. Congress party-in sorkarna a siam leh chuan healthcare hi changtlung takin, mipui thlamuanpui thamin kan kalpui leh ang," an ti a; chutiang an tih theihna turin mipui thlàwpna an ngen a ni.