MADC CEM atan M Laikaw lak luh a ni

Mara Autonomous District Council (MADC) sorkar chu November 25, 2022-a paihthlak a nih hnuah, nimin khan BJP kaihhruai sorkar thar lak luh a ni a; chief executive member (CEM) atan Tokalo bialtu MDC M Laikaw lak luh a ni.

CEM lak luhna hi nimin chhun dar 11:30 khan MADC Forest Hall-ah buatsaih a ni a; MADC CEM thar atan M Laikaw chu Siaha judicial magis­trate S Ngotlia chuan rinawmna thu tiamtirin a la lut a ni. Lak luhna inkhawm hi MADC execu­tive secy K Chhihrau-a'n a kaihruai a, Rev. B Beilua-a'n hunserh a hmang.

CEM thar M Laikaw chuan, a kaihhruai MADC sorkar tharah Pathian leh mipui duh dan ang zela an kal dawn thu a sawi a, "Langtlang sorkar a ni ang a, inthliarna a awm lo ang," a ti a; tluang taka an kal theih nan mipui, pawl hrang hrang leh media thlàwpna a ngen.

Nimin vek khan MADC sorkar thara execu­tive member (EM) tur mi pakua­te puan chhuah a ni a; chu'ngte chu - S Lalrem­thanga, K Hrahmo, MH Tiabi, K Chhuabei, L Prisila, Beirahmo Syhly, Tiahlei Syuhlo, T Seido leh J Vabeikiasa te an ni. Anni hi hun remchang hmasa­ah lak luh an ni ang.

C Chehnei chu deputy chairman a ni dawn a, N Lalrosanga chu Planning vice chairman a ni ang a; N Zakhai chu aviser to CEM a ni dawn a ni.