MJA-in hmun pahnihah charity fund a hlân

MJA General Headquarters chuan nimin khan MJA Charity Fund-a sum thawh khawmte Civil Hospital, Aizawl Poor Fund leh Together in Christ home, Melthum hnenah an hlân.

Civil Hospital, Aizawl (CHA) Poor Fund-a MJA Charity Fund sum inhlanna hi Medical Superintendent pisaah neih a ni a; MJA president C Lalrambuatsaiha'n CHA deputy medical superintendent Dr Lalchhuankimi hnenah Rs 50,000 a hlân a, Together in Christ hnenah Rs 20,000 a hlân bawk.

CHA Poor Fund-a ṭanpuina sum inhlannaah MJA President chuan, CHA chu MJA member-te duhsaktu a nih thu leh MJA pawhin an theih ang angin an duhsak ve ṭhin thu a sawi a, "Civil Hospital hi mi chi tin pan khawm, mi rethei ber berte pawhin an pan khawm a ni a, chutih lai chuan, mi rethei tak tak, damdawi-in pantute tan thawktute'n mahni sumte in séng nasa ṭhin tih kan hria. Eng emaw talah ṭangkaia in lo hman turin Charity Fund kan rawn pe ve a, kan ngaih pawimawhzia kan rawn lantir a ni," a ti.

Dr Lalchhuankimi chuan, CHA Poor Fund-ah MJA-in charity fund an pe chu a hlut tak zet thu sawiin, "A ṭul leh mamawhtute hnenah a thleng vek dawn a, ṭangkai taka hman a ni ang. Mizoram pumpuiin an pan khawm kan ni a, rethei tê tê pawh an tam a, ṭanpui mamawhtu an tam a ni," a ti a; MJA nen thawhhona ṭha an neih zel a beisei thu sawiin, CHA ṭhat tâwk lohna leh famkim lohnaah finchhuah zel turin a sáwm a ni.

CHA Deputy MS chuan, Krismas leh kumthar hunpuiah emer­gency a tam duh tih sawiin, "Chetsualnate a thleng duh a, chu'ng atan chuan kan inring lâwk a, kan phâk tâwkah theihtawpin kan inbuatsaih a, thawktu duty tur kan kan indah belh nual a ni," a ti.

MJA Gen.Hqrs hian kum eng emaw ti kal ta aṭang khan mi harsa zawkte ṭanpuina atan kum tin Krismas dawnah Charity Fund siamin, MJA member-te'n pawisa an thawh khawm ṭhin a; kuminah hian mi/pawl 99-in Rs 86,965 an thawh khawm. Sum thawhtu zingah MJA member mai bakah, MJA member la ni lo journalist dang te, MLA/minister ṭhenkhat leh MJA duhsaktu mimal/leh pawlte an tel.

Charity Fund thawh khawm aṭanga sum la bângte chu a remchan angin mi ṭanpuina atan an la hlân leh dawn a ni.