TANPUINA HLAN

Deputy chief minister Tawnluia chuan nimin khan a bial chhunga kum 70 chin chung lam mi 525 hnenah Krismas pualin Khawzawlah blanket a sem. Tuichang Assembly constituency-ah hian kum 70 chin chunglam mi 1,147 an awm a, an vai hian blanket pek vek tura ruahman a ni. Minister of state Lalruatkima pawhin nimin khan a bial, Aizawl West-II huam chhunga kum 75 chin chung lamte hnenah blanket 1,000 chuang a sem. Lalruatkima hian blanket-te chu Kanan Venga an inah a sem a; upate chu hnam rohlu an nih thu sawiin, "Kum upate hi an zahawm em em a, kan duatin kan theihna zâwnah kan duhsak tur a ni," a ti a; mi harsa zawk, mu lum zo lo an awm palh a hlau tih sawiin, chutiang an awm a nih chuan bengvarsak turin a ngen a ni.

Lunglei leh Champhai district-ah nimin khan district thuneitute'n hospital leh centre/home hrang hrangah Chief Minister Discretionary Grant aṭangin Krismas pual ṭanpuina an sem. Lungleiah chuan CM Discretionary Grant aṭanga hmuh Rs 39,000 chu hmun 13-ah sem a ni a, Champhaiah chuan hmun pasarihah sem a ni.