J Thankima College-in NAAC A+ a hmu

J Thankima College chuan National Assessment and Accreditation Council (NAAC) grade A+ a hmu thar a, Mizoram sorkar enkawl college zinga NAAC grade hmu sang ber a ni.

India rama university leh college-te endika an ṭhat dan tehtu NAAC aṭanga endiktu peer team chuan December 15-16, 2022 chhung khan J Thankima College an endik a; endik hnuah grade an pek thar chu December 20 khan tichhuakin, grade A+ an pe a ni. A pumpuiah cumulative grade point average (CGPA) 3.31 an hmu.

Thu dawn danin, NAAC hian grade pasarih a siam a, a hniam ber chu grade C a ni. J Thankima College hian tuna grade a hmuh thar hmaa grade a hmuh mek chu grade C a ni a; endik hnuhnung ber aṭanga grade tihchhuahah grade pali B, B+, B++ leh A te thlawh khûmin, grade sang ber dawttu A+ a hmu ta a ni.

Mizoramah NAAC grade A+ hmu college pahnih - Pachhunga University College leh J Thankima College an awm ta a ni.

J Thankima College hi kum 1994 khan Bawngkawng khawtlangin an din a, tunah hian zirlai 1,065 leh thawktu 51 an awm mek a ni.