Hunpuia venhimna chungchang sawiho

Home secretary H Lalengmawia chuan nimin khan video conferencing kaltlangin district tina DC, SP leh Excise & Narcotics officer-te a kâwm a, Krismas leh kumthar thleng tura mipui himna tur leh a kaihhnawih hrang hrang a sawipui a; chief secretary Dr Renu Sharma pawh a tel.

Home Secretary chuan, DC leh SP-te chu dan anga hna an thawhnaah hawihhâwm tura chahin, "Kohhran leh khawtlang hruaitute leh tlawmngai pawlte nen nasa zawka thawkho tum ang che u," a ti a; ráltlante chungchanga harsatna an sawi chungchangah, ruahmanna ṭha zawk nei thei tura ngaihtuahna sên a pawimawh thu a sawi.

District hrang hrang DC leh SP-te chuan, hunpui thleng tura an inpuahchahnate an tarlang. District tinah hâlpuah leh a kaihhnawih thilte khapna thupek chhuah vek tawh a ni a; zu leh ruih theih thil dangte khuahkhirhnaah ngawrh takin hma an la a, Krismas dawn hnaihah mobile patrolling neih an tum hlawm.

Chief secretary Dr Renu Sharma chuan, Covid chungchanga sorkar laipui ngaih pawimawhte a tarlang a; district tina thuneitute chu Covid-19 dinhmun thlithlai a, a tam thei ang ber test kalpui tura chahin, "Tunah chuan inkhuahkhirhna awm rih lo mah se, kan hmanraw neihte dinhmun hriat a, lo inrin lâwk a pawimawh," a ti.