PMGKY-Insurance-in task force a huam

Covid-19 Task Group on Insurance chuan, task force member, private healthcare institution-a thawk Covid-19 dona a tel te, Covid-19 damlo enkawltu te, health lam hnathawkte leh Covid-19 dona hna hrang hrang thawktu te, chetsualna vanga thite chu PMGKY-Insurance in a huam thu an tarlang.

Sorkar thuchhuah tarlan danin, PMGKY-Insurance-ah Covid-19 vanga thawktu thite tan zangnadawmna Rs. 50,00,000 ruahman a ni a, sorkar laipuia Ministry of Health & Family Welfare-in Covid-19 dona a thawktute tan a peksak tawh avangin mimala inziah luh leh sum (premium) pek a ngai lo. Insuarance dil turin kum bithliah a awm lo a, March 30 aṭanga ni 90 chhung a huam.

District hotute'n an district chhung ṭheuha khua leh veng tina task force zawng zawng list sorkarah an thehlut tawh a, task force-a tel tharte chu a rang thei ang berin district task force hotute emaw, DC-te emaw hnenah hriattir tur a ni. 

PMGKY-Insurance hian private healthcare institution-a thawkte pawh a huam a; thawktute hming, address kimchang leh an thih palha insurance dilsak theitu tur nominee list chu Dr Vanlalrengpuia SPM, NHM e-mail dr.rengpuia.chinzah@gmail.com-ah thehluh tur a ni.

Insurance claim duh leh thei chuan Task Group on Insurance chairman e-mail addlsecyfinance.mizoram @gmail.com emaw, member secretary e-mail: ngura.tlau@gmail.com-ah hriattir tur a ni bawk.

1.    Covid-19 direct-a kai theite - Covid-19 damlo enkawltute leh enkawlnaa tel zawng zawng, health lam hnathawkte leh task force-te. Dil dawn chuan Covid-19 vanga thi an ni tih chianna laboratory test report a awm tur a ni.

2.    Covid-19 donaa hna hrang hrang thawktute an hnathawhnaah chetsualna (accident) vanga an thi a nih chuan an dil thei.