MSHCS-a bill tángte kum 2022 chhung ngeia pe vek turin Mizoram sorkar phût

Congress ṭhalai, Mizoram Pradesh Youth Congress Committee (MPYCC) chuan thuchhuah siamin, MNF chu political game atana health care scheme hmangah an puh a; bill táng zawng zawng kumin 2022 chhung ngeia pe vek turin Mizoram sorkar an phût.

MPYCC chuan, MNF Media & Publicity department leh MNYF-te'n thuthar thehdarhtute hmaah, Mizoram State Health Care Society-a bill tángte rei lo têa chinfel an beisei thu an la sawi chauh mai chu mipui an ngaih pawimawh lohzia lannaa an ngaih thu an tarlang a, "Healthcare scheme hi political game-ah MNF hian an hmang tih hi mipui ngaihdan a ni tawh. Chhuanlam siam kual kawi tawh lo a, mipui hnenah bill tángte pe chhuak vek tawh turin Mizoram sorkar kan phût nawn leh a ni," an ti.

Kum li dáwn a vei hnuah pawh damlote'n bill an dawng thei lo chu lungchhiatthlak an tih thu sawiin MPYCC chuan, "Chutih laia ruling party thupuangtute'n healthcare bill pek thuai tum a nih thu an la sawi leih leih chauh mai hi mipui harsatna an ngaih pawimawh lohzia leh sum enkawl an thiam lohzia anmahni'n an hai lang thar leh ṭhin niin kan hria," an ti a; bill táng zawng zawng a bo a bâng awm loa kumin 2022 chhung ngeia pe vek turin Mizoram sorkar an phût a ni.