Supreme Court thupek zâwm turin chah

Mizoram Pollution Control Board (MPCB) chuan hâlpuah leh hâl­mawi chungchanga Supreme Court thupek nimin khan a tarlang a; mipui leh thuneitute chu ngai pawi­mawha zâwm ngei tura hriattir an nih thu a tarlang.

MPCB chuan, Supreme Court thupek aia khauh zawkin Mizoram sorkarin hâlpuah hâl khapna thupek a chhuah chu lawmawm an tih thu an tarlang a, "Hâlpuah hâl hian boruak a tibawlh­hlawh a, mihring hrisel­naah nghawng ṭha lo tak a nei a, chuap, mit leh bengte a khawih pawi thei. Hâlpuah ri bengchheng hian mipuiah chî-âina a thlen a, damlo leh tar chak lote tan harsatna a thlen nasa bik a ni," an ti.

Mizoram Pollution Control Board chuan, India danpui Article 21-in mi tinte hriselna a humhalh tlat thu tarlangin, "Mi dang hriselna khawih pawi zawnga khawsak a remti lo a, a bikin kum upa lam, dawráwm zawk leh naupangte hriselna khawih pawi thei zawnga chêt phei chu a rem lo lehzual," an ti a; hâlpuah hâl pawizia hre thar a, hunpui thleng turah pawh hâl lo turin mipui an ngen a ni.

SUPREME COURT THUPEK TLANGPUI
• Hâlpuah hralh phalna licence nei chauhin an zuar chhuak thei.
• Hâlpuah leh hâlmawi lam chi reng reng, chemical hlauhawm nêp zawk hmanga siam (green crackers) chauh hralh leh hman phal a ni.
• Chemical hlauhawm - antimony, lithium, mercury, arsenic, barium salt, strontium leh lead hmanga hâlphuah siam chhuah khap tlat a ni.
• Hâlpuah/hâlmawi inzawm chi (joined fire crackers/series crackers) siam, zawrh leh hman khap a ni.