Tourism project 4 atan nuai 4,488.52 hmu

Ministry of Tourism (PRASAD Division) chuan Mizoram hmun hrang hrangah khualzinte hìpna tur hmunhma pali siama cheibâwlna tur ruahman (project) hrang hrangteah sum pek chhuah a nih thu Mizoram sorkara Tourism department a rawn hriattir a; hna thawhna turin tender buaipui mek a ni.

Document-a a lan danin, Tourism Ministry-in PRASAD hnuaia Mizorama khualzinte hîpna tur hmun siamna tur leh sum a pek zatte chu - Chite Bazarpui (Aizawl Haat) atan cheng nuai 3,149.23, Hangi Lunglen Tlang atan nuai 491.27, Ailawng leh Reiek atan nuai 361.27, Khawruhliana Kalvari Tlang atan nuai 273.01-te a ni a; a vaiin nuai 4,274.78 a ni. Consultancy & contingency atana sum dah nuai 213.74 nen a pumpuia sum pek zat chu nuai 4,488.52 a ni.

Tourism minister Robert Romawia Royte chuan zawhna chhángin, project pali atan Tourism Ministry-in sum a sanction tawh thu a sawi a, "Mizoram sorkarin sum tum ve tur a nei lo a, sorkar laipuiin a tum vek tur a ni. Tunah hian tender buaipui mek a ni a, tender tihfel hnuah sum pek chhuah a ni ang," a ti. Executing agency atan Ministry of Tourism-in Mizoram Tourism Development Authority a thlan nghal thu a sawi bawk.