Aizawlah No Vehicle Zone: Vawiinah chhunzawm a ni dawn

Coordination Committee on Traffic Management rorel angin nimin December 23 khan Aizawlah lirthei tlân phal loh hun leh hmun kalpui a ni a; vawiin December 24-ah pawh kalpui leh a ni ang.

No Vehicle Zone hi chawhma dar 10 atanga tlai dar 4 thleng Zodin Square leh Chanmari kâwn inkarah kalpui a ni a; Zone huam chhungah dam lohna leh rîkrum thila tlân tlang ngei ngai lirthei tih loh chu lirthei tlân tlang a awm lo. Kawngpuiah lirthei tihbuai lohin ngaihngam tak leh zalên takin mipui an kal thei a ni a, nau nâwi nena chhuakvâk pawh hmuh tur an awm nual a ni.

Lirthei tlân phal lohna huam chhung hmun thenkhatah nimin khan mite tanpuina atana thawhlawm khawn paha zai an awm nual a; kawngpuiah mipui an tâwt lutuk lo a, vawiin lamah bazara kal leh chhuakvâk an tam zawk rin a nih thu, bazara dawr nei thenkhat chuan an sawi. New Market-ah erawh chuan mi an tam a, kea kalna hmun hrang hrangte a tâwt hle.

New Market thuneitute chuan, Covid-19 lên hmaa nunphung a pangngai lai aiin kuminah New Market huam chhungah thil bo report an dawng tlem zawk tih an sawi.

Krismas bazarah venhimna thil atan leh mipui tana pan awlsam zawkna turin police-te'n Israel Point bula taxi stand-ah Help Desk an siam a, police eng emaw zatin an thutchilh a, hmun hrang hrangah police-te an kal kual bawk.

No Vehicle Zone hi vawiinah chhunzawm a ni dawn a, December 31-ah kalpui leh a ni bawk ang.