Covid-19 laka invenna ngai pawimawh turin mipui ngen

China ram leh ram dang thenkhatah Covid-19 a darh thar leh avangin sorkar laipuiin state tinte chu fimkhur turin a chah a; Mizoram sorkar pawhin hripui laka invenna ngai pawimawh turin mipui a chah.

Covid-19 thupuangtu Dr Pachuau Lalmalsawma chuan, tun hnaiah Japan, USA, South Korea, Brazil leh China ramahte Covid hrik chhuak thar BF.7 a pun chhoh zel avangin December 23, 2022 khan Union Health minister Dr Mansukh Mandaviya hoin ram pum huapin video conference neih a ni a, Covid-19 chungchanga state hrang hrang hmalakna turte sawiho a nih thu a tarlang a; Covid-19 laka invennate tharthawh leh tha tih a nih avangin Mizoram mipuite chu ngai pawimawh turin a ngen a ni.

Hetih lai hian, Mizoramah Covid-19 vei thar an la awm lo zel a, Mizoram chu chawlhkar khat chuang hripui vei awm lohna state a ni tawh.

Mizoramah December 23, Zirtawpni khan swab sample 39 endik ni mah se, Covid-19 vei an awm lo. Nimin December 24 khan sample endik a ni lo. Mizoramah Covid-19 vei an awm tawh lo a, December 15, 2022 atang khan hripui vei an awm tawh lo a ni.

Mizoramah sample 19,92,834 endik a ni tawh a, Covid-19 positive mi 2,38,964 hmuh a ni tawh. Positive zinga mi 2,38,238 (99.7%) chu dan taka chhuahtir an ni a, mi 726 (0.3%) an thi tawh thung.