KHAWTHLIR

Horticulture department-a Mamit sub-division chuan nimin khan khaw hrang hrangah thlai chî chi hrang hrang an sem. Chu'ngte chu - french bean chî kg. 40, behlawi chî kg. 20, hmarcha chî kg. 4, changkhâ chî kg. 18, bawkbawn chî kg. 20, úm ei chî kg. 5, bawrhsaibe chî kg. 30, fanghma chî kg. 5 leh dhania chî kg. 10 a ni.

Nursery Venglai Branch KṬP chuan nimin khan Synod Hospital blood bank-ah thisen unit 16 an pe a, a petute mipa 14 leh hmeichhia pahnih an ni.

Covid-19 hripui laka invenna leh do nan nimin khan tlai dar 3:30 thlengin mimal leh pawl pangate'n Chief Minis­ter's Relief Fund-ah 4,12,000 an chhûng lût.

Mizoram Synod chuan May 13, Nilaini zinga Rengdil leh Zamuang khuaa rial tlain in a tihchhiatte chhawmdawl nan nimin khan Rs. 9,00,000 a pe. Allahabad-a Pathian thu zir mek Mizo tangkhangte April 2020 hostel mess fee atan Rs. 45,000 a pe bawk.

Serchhip district-ah sorkarin quarantine centre a siamah mi 41 an awm mek a, nimin khan Jharkhand aṭanga Ser­chhip district mi haw thar mi paruk chu Khawtetlang Tourist Lodge-ah dah an ni. Mi parukte hi Dr Joseph Lalmuanpuia Hauzel kaihhruai medical team-in Rapid Antibody Test (RAT) an tihsak vek a, rinhlelh kai an awm lo tih sorkar thuchhuah chuan a tarlang.

ZPM Ṭhalai chuan, hripui léng vanga mipui nunphung nasa taka a khaihlak mek laia Mizoram Board of School Education (MBSE)-in May 13, Nilainia HSLC Examinations 2020 result tluang taka a tichhuak thei chu lawmawm an tih thu leh pass percentage 68.33% lai a ni chu lawmawm an tih thu an tarlang.

Lunglei North bialtu MLA Dr Vanlalṭanpuia chuan nimin khan a bial chhung Pûkpuia Jawahar Navodaya Vidyalaya (JNV) behchhana quarantine centre siam a tlawh a, centre viltute kawmin, an dinhmun a zawtfiah.