PWD E-IN-C HLUI PAHNIH EIRUKNAA THIAM LOH CHANTIR TAWHNA HIGH COURT-IN A THIAT LAILÂWK

Serkhan-Bagha inkar kawngpui siamnaa sum tihchingpen thubuaia Special Court (PC Act)-in PWD engineer-in-chief hlui pahnih - Liansanga, Khatla leh Lianchungnunga, Chaltlang te thiam loh a chantir tawhna thutlukna chu kaltlangpui loh turin Gauhati High Court, Aizawl Bench-in dah rih a; thubuai hi High Court-in a ngaihtuah chhunzawm dawn.

Tarlan tawh angin, special judge (PC Act) Dr HTC Lalrinchhana chuan PWD E-in-C hlui Liansanga chu Serkhan-Bagha road chungchangah thiam loh chantirin, kum 5 táng tur leh Rs 40,00,000 cháwi turin a ti a, E-in-C hlui dang Lianchungnunga pawh thiam loh chantirin, kum 4 táng tur leh Rs 20,00,000 chawi turin a ti bawk.

Special Court thutlukna hi Liansanga leh Lianchungnunga te chuan Gauhati High Court, Aizawl Bench-an an khing lêt a; HC judge Justice Marli Vankung chuan December 22, 2022 khan ngaihtuahin, finfiahna tha tâwk awm loah ngaiin Court hniam zawk thutlukna chu kaltlangpui rih loh turin a ti a, thubuai a ngaihtuah chhunzawm dawn a ni.

High Court order-a a lan danin, December 22-a High Court-in a ngaihtuahnaah hian Liansanga te aiawhin ukil Angshuman a ding a, sorkar aiawhin additional public prosecutor Linda L Fambawl a ding thung. Special Court thutlukna an khin letnaah hian, CrPC Section 389 hmangin Special Court thutlukna chu thiat turin an ngen a, HC-in thutlukna a siam hma chuan bail-a chhuah phalsak turin an ngen bawk.

Khin letnaah hian Liansanga te ukil chuan, Special Court (PC Act)-in thubuai a ngaihtuahnaah prosecution sanction mumal a awm loh thu leh sanctioning authority chu chhui chian a nih loh thu a thlen a; thil tisualtu tak (prime accuse) zawk B Lalthanpuia, PWD assistant/accountant chu chhuah zalen a nih thu te, direct-a sum inpekna a awm loh thu te, kawng siamna tura sum pek chhuah, hman si lohte chu SBI, Kolasib-ah thun (deposit) a nih thute a tarlang bawk.

High Court order-ah chuan, Special Court (PC Act)-in Liansanga te thubuaiah finfiahna tha tawk a nei lo nia a lan thu a chuang a; chuvang chuan, Liansanga te ukil chuan finfiahna tha tawk a awm loh avang te, an kum a upat tawh a, jail-a táng turin an dinhmun a that tâwk loh avangte leh Aizawla awm nghet an nih tho avangtein bail-a chhuah phalsak turin a ngen a ni.

Tarlan tawh angin, Serkhan-Bagha Road siamnaah sum eiruk a awm nia hriain November 3, 2009 khan khatih laia Hmarphei Zirlai Pawl president B Vanlaltána chhan ACB-ah complaint a thehlut a, ACB chuan preliminary enquity ti turin November 12, 2009-ah an ziak lut a, ACB inspector Jimmy L Renthlei-in a chhui zui a, August 13, 2012-ah ACB-ah eirûk thubuai ziah luh a ni.

Thubuai hi Gauhati High Court, Aizawl Bench chuan chawlhkar li hnuah a ngaihtuah leh dawn a, chutah chuan lehkha pawimawh hrang hrangte thehlut turin khing lettute ukil leh sorkar ukil a hriattir a ni.