Lungleng ramah mi kah hlum a ni

December 25, Krismas zing khawvar hma khan Lalhmingsanga (40) s/o Siamliana, Mission Veng chu a ramvahnaah silaia kah hlum a ni tih hriat a ni a, thu zawhfiah atan a ramvahpui chu police-in an kawl.

Thu dawn danin, Lalhmingsanga hi a nupui fanaute nen Lungleng rama an huana ran an vulhte enkawl turin December 20, 2022 khan an kal a, December 24 chhun khan a u Thuamluaia, Venghnuai nen ramvak turin an chhuak a ni.

Tlai dar 5 velah silai puak ri hriat a ni a, a hnuah vawi khat dang hriat a ni leh bawk a; a chhungte'n phone-an an biak dawnin, Lalhmingsanga hian phone a lak loh avangin mi dang punin an zawng a, nimin December 25 zing dar 4 vel khan thing hnuai lungpui bulah thia hmuh a ni.

Lalhmingsanga taksaah silai mu luhna hmuamhmá pakua a awm a, pakhat chu a khabê-ah lutin, a dang chu a malpui leh a bánah a lut a ni.

Lalhmingsanga ruang hi nimin khan Zoram Medical College-ah endik a ni a, nimin vêk khan vui a ni. A nupui Lalniengi leh an fate pathum a kalsan. A ramvahpui chu police-te'n thu zawhfiah turin Kulikawn Police Station-ah an la a, an hréng mek a ni.