Naupang zahmawh kaihhnawihah mi pakhat man

Zahmawh thila naupang kaihhnawih thlalak (child pornography) siam chungchangah Mizoram police-te chuan December 22, 2022 khan Lalrohlua Paite (20) s/o Lalrammuana, Lunglei Bazar Veng an man.

Mizoram Police tarlan danin, National Cyber Crime Reporting Portal atanga thu an dawnah, Mizorama mi pakhatin Google Drive-ah naupang zahmawh kaihhnawih thil a nei tih hriat a ni a; Cyber Crime Police Station-ah thubuai ziak lutin, an chhui zui a ni.

Police-te chuan uluk taka an chhui hnuah leh finfiahnate an endik hnuah dan phal loh thil titu Lalrohlua Paite, Lunglei Bazar Veng chu December 22 khan an man a, a hmanruate pawh man nghalin, Forensic lamin an zir chian turin an thawn a ni.

Mizoram Police chuan, naupang kaihhnawih zahmawh thil siam, thawn chhuah leh download-te chu dan bawhchhiatna a nih thu leh dan hnuaiah na taka hrem theih a nih thu an tarlang.