Bualpui Ng khawtlangin an khuaa damdawi-in sak mek an chhu chhia
Lawngtlai district chhung, Bualpui Ng khuaa damdawi-in, primary health centre sak mek chu sak dan a chhiat em avangin nimin khan khawtlang mipuiin an chhu chhia.
Bualpui Ng Joint NGO hruaitute sawi danin, damdawi-in hi cheng nuai 253 senga sak tur a ni a, kumin February thlaah sak ṭan a niin, a satu contractor chu Lalramdinthara, Aizawl lam mi a ni.
Contractor-in hna a thawh ṭan dawnah Bualpui Ng khuaa tlawmngai pawlte chuan hna thawh ṭha lo an duh loh thu leh ro tling ni tura sak an duh a, ṭha taka sa turin contractor an hrilh a; an duh ang leh beisei anga hna a thawh loh chuan an tihchhiat tur thu an hrilh lawk bawk.
An hna hmasa quarters type C leh D saknaah pawh ṭha lo taka an lo sak tawh avangin siamṭha turin an hrilh a, siamṭha ve bawk mahse an duhkhawp lo hle a ni.
December 21, 2022 khan Young Lai Association (YLA) sub-headquarters leh branch ṭhenkhat hruaitute'n Bualpui Ng PHC sak mek chu a ṭhat leh ṭhat loh an enfiah a; hna ṭha tawk lo laite a awm avangin an lungawi lo a ni.
YMA chuan contractor chu hna thawk chhunzawm rih lo turin an ngen a, mahse, contractor chuan YLA-in stay order an pek theih loh thu PHC-a Medical Officer hnenah an hrilh a, Medical Officer pawhin hna thawk chhunzawm turin a tih angin, hna an thawk chhunzawm a ni.
YMA hruaitute chuan December 24, 2022 khan PHC sak mek chu an enfiah leh a, a ṭha lo nia an hriat avangin hna thawktute chu chawl turin an hriattir a ni. An ngenna chu contractor-in a ngaih pawimawh loh avangin December 26 zan khan YLA leh pawl hrang hrang hruaitute chuan hmalak dan tur an rel a; damdawi-in chu a ṭha thei ang bera sak an duh avangin chhut chhiat an rel a, nimin khan an chhu chhe ta a ni.
Bualpui Ng Joint YLA hruaitute chuan, damdawi-in sak mek an chhut chhiatna aṭangin damdawi-in sak chu hmuh theiha a chhiat dan an hriat aia nasain a ṭha lo tih an hmuh chhuah belh thu an sawi a; a ruhrel pawt nghettu tie-beam-ah ring rod hmuh tur a awm mang loh thu te, cement leh balu dik taka chawhpawlh a nih loh thu te, a karah lung no phum ruk tam tak a awm thu te, cement an hman pawh a ṭha tawk lo nia a an thute an sawi bawk.