Mizoramah BF.7 mock drill neih a ni

Mizoramah ni 15 chhung Covid-19 vei hmuh chhuah a ni tawh lo a, Covid hri thar BF.7 pawh vei an la awm lo. Hetih lai hian, nimin December 27 khan Mizorama sorkar damdawi-in hrang hrangah BF.7 chungchanga inpuahchahna atan mock drill neih a ni.

Mizoramah Covid-19 hri thar BF.7 a luh pawha lo hmachhawn dan tur ngaihtuahin nimin December 27 khan Health & Family Welfare secretary Esther Lal Ruatkimi hoin HFW department hotute an ṭhukhawm a, hmalak dan turte an duang.

Ṭhutkhawma tarlan danin, khawvel hmun hrang hrangah BF.7 a len mek laiin, India ram dinhmun a la ziaawm hle a, Mizoramah pawh virus thar hmuh a la ni lo a, ni 15 chhung chu Mizoramah hripui vei hmuh a ni tawh lo.

Ram dang ṭhenkhatah BF.7 a len mek avangin Mizoramah pawh a luh palh theih avangin a ṭul angin nasa zawka swab sample endik a nih theih nan district tina damdawi-inte chu hritlang satliah anga lang thlenga enfiah ṭhin tura tih a ni.

Nimina mock drill-ah hian Covid hri chhuak thar Mizoramah a luh palha hmachhawn dan tur entir a nih bakah, hmanrua leh mamawh hrang hrang neih dan dinhmun enfiah a ni.

ṬHUTKHAWMA TARLANTE

* Covid-19 endikna hmanruate Mizoramah a awm ṭha.

* Sorkar laipui duh angin, Covid-19 positive thar an awmin, eng hrik ber nge a nih hre turin Whole Genome Sequencing (test) tih ṭhin tur a ni a, Zoram Medical College VRDL-ah tih theih a ni tawh. BF.7 hmuh chhuahna atan bika bawlhlo (reagent) pawh National Institute of Virology, Pune atangin a lo thlen thuai beisei a ni.

* India rama international airport hrang hrangah khualzin lut zingap 2% chauhin BF.7 test an paltlang avangin ram dang atanga Mizorama zin hawte chu Covid-19 symptom an neih chuan mahni mawhphurhnaa ngaiin swab test tura beisei an ni.

* Covid-19 laka invennate ngai pawimawh turin mipui an ngen.