Ram hmasawnna atan sorkarin theihtawp a chhuah zel dawn - CM

Chief minister Zoramthanga chuan nimin December 28 khan Sihphir Venghlun Futsal Ground-a phûl lem phah thar a hawng a, futsal-a intihsiakna a hmanpui nghal. CM chuan, ram hmasawnna atan sorkarin theihtawp a chhuah zel tur thu a sawi.

CM Zoramthanga chuan, hmasawnna ruhrel hrang hrang din turin sorkarin hma a lak thu sawiin, hna thawh mek leh hmabak awmte a sawi a; ram hmasawnna atan sorkarin theihtawp a chhuah zel tur thu a sawi a ni.

Hmasawnna hna thawh tur zingah Durtlang Leitan leh Sihphir inkar kawng zauh a tel thu sawiin Zoramthanga chuan, "Hemi atana sorkar laipui aṭanga sum sanction hmuhah compensation component a tel lo," a ti a; Mizoram hmun ṭhenkhatah zangnadawmna beisei vang leh beisei an tam lutuk vanga hmasawnna hnathawh a ṭhuanawp phah tawh dan sawiin, "Kan zavaia ṭhat tlànna tur a ni tih hria a, rilru zau tak puin, ram siam rem ngai chungchang lo en zuitu tur committee pawh a ṭul anga din a ṭha," a ti.

Chief Minister chuan, Sihphir pum chu hmun remchang, hmasawnna ruhrel din belh zelna tura hmunhma nei ṭha a nih avangin zirna lam, infiamna lam, hriselna lama hmasawnna ruhrel din belh theih remchang leh hmalak dan turte ngaihtuaha rilru seng tura a duhsak thu a sawi bawk.

Sihphir Venghlun Futsal Ground hi kum 2018-ah a hmunhma buatsaih a ni a, a chhuat siam nan bialtu MLA Chief Minister Local Area Development Fund Rs 3,00,000 hman niin, bialtu MLA fund dang Rs 4,00,000 hmangin phùl lem phah a ni.