Central Jail-a táng mek a tlânbo

Central Jail-a táng mek Lalvenhima (25), Khuangthing, Champhai district chu nimin zing dar 5:30 vel khan jail aṭangin a tlân chhuak a, police-in man tumin an zawng mek.

Thu dawn danin, Lalvenhima hian jail aṭanga tlan chhuak turin a mutpuan (bedsheet) a hmang a; bedsheet hmangin jail hungna bangah a láwn liam nia hriat a ni.

Lalvenhima hi kum tling lo pawngsual thubuaiah kum 2018 khan man a ni a, December 6, 2022 khan Court-in thiam loh chantir niin, kum 20 chhung táng tura hrem a ni.

Lalvenhima hi ft. 5’7” vela sang a ni a, a nghawng hma lam leh a mit veilam bulah khuavàng chhinchhiah a awm a; a áwmah 'Hlupuii' tih tattoo a inziak bawk.