Rs 1,93,715 hù hàlpuah/hàlmawi man

Lunglei police-te chuan nimin December 28 khan Lalngaizuali (27) d/o Thansanga, Lunglei Chanmari-I hnen aṭangin hàlpuah leh hàlmawi chi hrang 15 an man a, a vaiin Rs 1,93,715 man a ni.

Halpuah leh halmawi kawltu Lalngaizuali hi police-te chuan an man a, a lakah Lunglei Police Station-ah thubuai ziah luh a ni. Bail theih a nih angin Lalngaizuali hi bail-in chhuahtir leh nghal a ni.

Mizoram Police chuan halpuah, halmawi leh a kaihhnawih thilte chu khap a ni tih tarlangin, hâl lo turin mi tin an ngen a, "Halpuah leh halmawi dangte hian boruak an tichhia a, bungrua, ramngaw, mihring leh ramsate tan kângmei leh harsatna dang tam tak a thlen thei a, hunpui kan hman mekah hian halpuah leh halmawi dangte tel loin hlim takin hman i tum ṭheuh an u," an ti.

Police thuchhuah chuan, halouah, halmawi leh a kaihhnawih thil khapte bawhchhia chu hrem theih an nih thu a tarlang a; police thubuai neih chu thil pawi tak thlen thei a nih avangin khapna thupek zàwm ṭheuh turin mipui an ngen a ni.