BF.7 vanga chî-àina tur awm loah ngai

Khawvel hmun ṭhenkhata Covid-19 hri thar, BF.7 darh mek vanga Mizorama invèn dan tur sawihoin nimin December 29 khan chief secretary Dr Renu Sharma hoin Health & Family department hotute an ṭhukhawm a; BF.7 chu Mizoramah a la luh loh avangin nunphung pangngai pèla hmalak a la ngai rih loah an ngai.

Ṭhutkhawmah hian, ram hrang hrangah BF.7 a len mek laiin, India ram dinhmun a la ziaawm hle thu te, BF.7 chu Mizoramah a la luh loh thu te, tun dinhmunah chî-àina tur leh nunphung pangngai pèla kal a ṭul rih loa an ngaih thute an sawi a ni.

Chutih rualin, India ramah BF.7 a luh tawh avang leh a lenna ram aṭanga khualzinten khawi state pawh án tlawhpawh theih avangin, hripui laka invennate ṭha taka kalpui ṭul an tih thu an sawi bawk.

Lungleiah pawh bawrhsap Kulothungan A hoin a pisaah Covid-19 chungchang nimin khan sawiho a ni a; hripui a darh leh palha inpuahchah dan tur leh Lunglei district-a hripui dona hmanrua awm mek dinhmun sawiho a ni.

Kulothungan A chuan, ram hrang hrangah hripui a darh leh mek tih sawiin, "India ramah pawh active case mi 3,500 chuang an awm mek avangin kan district pawh kan inpuahchah lâwk a, hripui dona hmanrua kan neihte dinhmun thlirho a ṭul a ni," a ti a; HFW department hotute chu an mamawhte thlen vat turin a chah.

Ṭhutkhawma tarlan danin, Lunglei district-ah hian December 15, 2022 aṭangin Covid-19 positive hmuh chhuah a ni tawh lo a; RT-PCR test kit 7,000, TrueNAT test kit 1,000, rapid antigen test kit 3,000, PPE 1,200 leh N-95 mask 500 an nei mek. Oxygen búr 417 neih mek a ni a, bur ruakte thun turin Aizawlah thawn mek a ni bawk.