AMC-in 2022-23 budget ennawn a ni - Budget atan nuai 10,118.48 an pawm

Aizawl Municipal Corporation (AMC) Board of Councillor (BoC) chuan nimin December 29 khan kum 2022-23 budget ennawnin, revised estimate an siam a, kum 2022-23 budget atan an pawm.

AMC BoC hi nimin khan AMC Meeting Hall-ah an ṭhukhawm a, mayor Lalrinenga Sailo-in a kaihruai. Executive councillor (Cash & Accounts) Lalringliana'n Mizoram Municipalities Act, 2007-in a phût angin 2022-23 AMC budget revised estimate a pharh a ni.

Kum 2022-23 atana AMC budget estimate cheng nuai 6,569.96 chu March 10, 2022 khan pharh niin, pawm a lo ni tawh a; nimina ṭhutkhawmah hian revised estimate cheng nuai 10,118.48 pharh niin, pawm a ni. BE aṭanga RE punna chu cheng nuai 3,548.52 a tling. Budget hmanna tur ruahmanna an siam nghal bawk.

2022-23 AMC budget RE-a a lan danin, AMC hian sum hmuhna - Own Source of Revenue-ah nasa takin hma a sawn a; kum 2022-23 chhunga AMC-in sum a thawh chhuah tura beisei zat chu cheng nuai 889.9 a ni.

AMC hian kum 2022-23 chhungin Rs 8,89,90,000 hmuh a beisei a, state sorkar aṭangin Grants-in-Aid cheng nuai 2,301.39 leh Central 15th Finance Commission aṭangin cheng nuai 3,500 hmuh a beisei bawk.

AMC hian budget zinga 76.76% chu mipui kaihhnawih leh hmasawnna hna thawhna atan hman turin a ruahman a; inrêlbàwlna atan 23.24% dah a ni thung.

AMC sum hnár pui ber, Own Source of Revenue-ah 15th Finance Commission-in a beisei anga a pung zawnga an kal thei chu lawmawm an tih thu an tarlang.

AMC SUM THAWH CHHUAH BEISEI

No. Budget Head Budget RE

1. Property Tax Rs 5,00,00,000

2. Rental Income Rs 28,00,000

3. Fees & User Charge Rs 2,68,90,000

4. Sale & Hire Charge Rs 53,00,000

5. Bank Interest Rs 40,00,000

TOTAL Rs 8,89,90,000