Bawlhhlawh sâwngbàwl chungchang sawiho

UDPA department hmalaknain nimin khan UDPA Directorate-ah Mizorama district khawpui leh khawpui dangtea bawlhhlawh sâwngbàwl chungchang sawiho a ni.

Consultative meeting hi UDPA secretary Lalmalsawma Pachuau-in a kaihruai a; UDPA department leh SIPMIU hotute bakah, Serchhip, Mamit, Saitual, Khawzawl leh Hnahthial district hotute an tel.

Lalmalsawma Pachuau chuan, National Green Tribunal-in state tam zawkte bawlhhlawh sawngbawl dan fel tâwk lo vanga pawisa tam tak a chawitir laiin, Mizoram chu chawitir a ni ve lo tih a sawi a; pawisa chawi ve lo mah se, district khawpuite leh khawpui dang, solid waste mangement centre (SWMC) la awm lohnaah a rang thei bera din a ṭul thu leh, SWMC siamna turin Planning department nen sum ngaihtuah mek a nih thu a sawi bawk.

Ṭhutkhawmah hian bawlhhlawh sawngbawlna atana sum sen ngai tam lutuk tihziaawm nan decentralised waste management zúlzuiin, hmun khatah chauh ni lo, khaw chhung hmun hrang hrangah sawngbawlna hmun siam dan rang taka ngaihtuah ni se, an ti a; DC tinte'n an district ṭheuha bawlhhlawh dinhmun zir chiang se, bawlhhlawh ṭawih thei (wet waste)-te chu a tam thei ang ber home composting leh community composting hmanga leiṭha siam nan hman ni se, tiin rel a ni.