Bualpui Ng YLA-in an khaw damdawi-in sa turin Excel Consultancy Services an duh

Bualpui Ng khuaa Young Lai Association (YLA) branch hrang hrang intel khawm, Joint YLA chuan thuchhuah siamin, an khuaa damdawi-in (primary health centre) sak mek a chhiat lutuk avanga December 27, 2022-a an chhut chhiat tâk chu Excel Consultancy Services-in a rang thei ang berin sa se an duh thu an tarlang.

Bualpui Ng Joint YLA chuan, "Mizoram sorkarin duhsak taka cheng nuai 253 sénga PHC building RCC-a sak mek hna enkawl mektu site engineer hi a rang thei ang berin Excel Consultancy Services-in thlâk rawh se... Bualpui Ng khawtlangin hnatlanga kan chhut chhiat hi Excel Consultancy Services-in February 2023 thla ral hma ngeiin hna thawk ṭan leh rawh se," an ti.

Khawtlângin a tihchhiat ngai khawpa hna ṭha lo a awm chu pawi an tih thu sawiin Buakpui Ng Joint YLA chuan, "Kan ram tana ro tling hnutchhiah hi kan ram roreltute duh dan pawh a ni ngeiin kan ring," an ti a; chhe lutuka hna thawktu contractor chu a phu tâwkin sorkarin hrem ngei se an duh thu an tarlang.

BUALPUI NG TARLAN DANGTE

* PHC sak meka cement work - head mistiri leh a hnuaia thawkte hi a rang thei ang berin Excel Consultancy Services-in thlak rawh se. Hna ṭha lo taka thawk duhtu hnam dang mistirite hi an ILP sorkarin cancel nghal rawh se.

* PHC RCC building type B,C & D sak zawh tawh tuna luah luh lailâwk, a chung far siamṭhat ngai, a chhe lai siamṭhat ngai leh siamṭhat turte Excel Consultancy Services-in March 2023 ral hmain, a rang thei ang berin siamṭha vek rawh se.

* Ṭha lo taka thawk duh hi kan ram hmelma lian tak an ni a, kan ram leh khawtlangah eng hna mah thawk tawh lo se kan duh.

* Bualpui Ng Joint YLA chuan kan ram, hnam leh khawtlang tana thil ṭha tur nia a hriat eng thil pawh, thil ṭha lo chu huaisen takin a do zel dawn.

* Mizoram sorkar hian contractor-te PHC, Bualpui Ng sak hna an thawh mek a hma thei ang berin chhunzawmtir rawh se.