Ailawng khuain Centenary lawm

Ailawng khua chuan February 8, Inrinni khan an khuaa Khuangchera Rûnah Ailawng khaw kum 100 tlinna (centenary) an lawm a, bialtu MLA Lalrintluanga Sailo, government deputy chief whip-in a hmanpui.

Lalrintluanga Sailo chuan, Ailawng khaw chhehvel ram ngaw humhalh a, zin mite hîpna tur leh Ailawng khaw mipui tana eizawnna siamsakna tura cheng nuai 100 sênga ruahman Community Based Environment and Ecotourism Development Project a hawng nghal. Project hi January 25, 2019-ah thawh ṭan a ni a, project huam chhungah thil chi hrang hrang a awm a, chu'ng zingah chuan Ailawng khuaa mi ṭhenkhatte Sikkim-a khualchhàwn dan zirtirte pawh a tel.

Ailawng hi kum February 8, 1920-ah luah ṭan a ni a, tun dinhmunah in 152 awmin, mi 735 an chêng mek. Centenary lawm nan hian tlaiah khawtlangin ruai an ṭheh a ni.