Indo-Myanmar insumdawn tawn dan tur sawiho

Minister of state TJ Lalnuntluanga chuan nimin December 29 khan Champhai Kahrawt Venga an inah Zokhawthar kaltlanga Myanmar nena insumdawn tawnna tihchangtlun dan tur district bawrhsap James Lalrinchhana leh SP Lalrinpuia Varte te a sawipui.

TJ Lalnuntluanga chuan, Zoramthanga kaihhruai Mizoram sorkarin 2019 kum bul aṭangin Indo-Myanmar border trade tihchangtlun nan theihtawp a chhuah tih sawiin, "Land Custom Station tichangtlung a, integrated check post (ICP)-a hláng kai turin hma a la nghal a ni," a ti.

ICP-ah food testing laboratyory, plant quarantine centre, animal quarantine centre, weightbridge leh hmanraw dangte dah tur a nih thu sawiin Minister chuan, "Hemi atan hian cheng nuai 1,500 zet sorkar laipui aṭangin hmuh a ni," a ti a; Zokhawthar leh Khawmawi (Myanmar) inkara Ṭiau lei siam tura ruahman a nih thu a sawi.

Sawihonaah hian, Myanmar tualchhung buaina avanga Myanmar nena insumdawn tawnna chàwl ṭhuap chu remchangah la a, mumal zawka insumdawn tawnna kalpui a nih theih nan buaipui ṭul angte inhmakhua a, zir chian ṭha an ti a; khawchhak tlangdung mipui leh sumdawngte'n dan ang taka insumdawn tawnna an hlâwkpui theihna tur te, tlawm zawka ni tin mamawh hmuh theihna turin insumdawn tawnna felfai zawk ruahman dan tur te, hmun danga kalpui tawh dante zir chian dan turte an sawiho a ni.