Thawh hreh nei lo turin zirlaite chah

MZP Headquarters, Champhai chuan nimin December 30 khan Vanhnuailiana Hall, Ruantlangah Conference vawi 1-na an hmang chhunzawm a, minister of state TJ Lalnuntluanga'n a hmanpui. Minister chuan, hna thawh hreh nei lo turin zirlaite a chah.

TJ Lalnuntluanga chuan, ngaihtuahna dik leh ṭha neih a ṭul thu leh hlawh hmu tlaka thawh a pawimawh thu sawiin, "Kan ngaihven leh thlir dan a dik hmasak hnuah hmasawnna dangte a tahtawlin a rawn awm zel dawn a ni," a ti a; hna thawh hreh nei loa mahni intodelh tur leh chhungte pui thei tura ngaihtuahna séng turin zirlaite a chah a ni.

Zirlaite chu social media hman chin tâwk thiam tur leh social media kaltlanga thil vawrh darh nazawng awih nghal mai ṭhin lo tura chahin Minister chuan, "Ram hmasawnna leh ṭhang mek zelah Zo fate kan hniam bik lo a, indah hniam bik mai lo a, hmasawn zel tura kan pên chhuah a ṭul tak zet a ni," a ti.

Minister chuan, ram leh hnamin harsatna a tawhin MZP-in hma a la ṭhin nia sawiin, zirlaite chu ram leh hnam tana lehkha zir an ni tih inhre turin a chah a, "Ram leh hnam mai bakah, sakhuana thlenga vawn nun a pawimawh a, hnam leh sakhuana kal kawptir a, dik lo hnâwl ngamna hmangin hmasawnna dik tak kan thlen thei dawn a ni," a ti a; ngaihdan leh zeldinna ṭha lote bànsan a, mi dangte nun dan leh thil tihah buai mai loa mahni hmazawna mawhphurhna tlate ṭha taka hlen tum turin zirlaite a chah.

MZP Headquarters, Champhai Conference vawi 1-na hi December 29, 2022 zan khan ṭan niin, thupui chu 'Zirlalite ram leh hnam tan' tih a ni a, nimin khan chhunzawm niin, nizan khan a ṭiak a ni. MZP Hqrs, Champhai hi kum 1994-ah din a ni a; an hnuaiah sub-headquarters panga leh branch 17 an awm.