Maxicab chesualah mi 5 an thi

Nimin December 30 zing dar 4:30 vel khan Zokhawthar - Aizawl maxicab, Zokhawthar pana tlân chu Champhai Chhungte dáiah chesualin, khàm sáng takah a tla a; mi pariat chuang zinga panga an thi a, mi dang pathum an hliam.

Thu dawn danin, maxicab (MZ-01G-6395) hi khàm sáng takah tlain, a thlanga kawngpui sial thar NH-6 ah a tla thla a ni. Chetsual chhan hriat chian a ni lo a, a khalhtu a muthlu a nih an ring. Lirtheiah hian hmeichhe pakhat leh a fanu naute kum 2 mi an tel a, mi dang zawng chu mipa an ni.

Chetsualna hmunah mi pali an thi nghal a, chu'ngte chu - Ṭialliancheuva (34), Chichai, Myanmar te, Parṭhai, Kawilam, Myanmar te, Mungsiandawng (37), Pakzang, Myanmar leh Ginsiankhup (32), Sialtui te an ni. Lirthei khalhtu Lallunghnema (36), Melbuk chu Champhai District Hospital thlenpui a nih hnu lawkah a thi bawk.

Mi dang pathum hliamte chu damdawi-inah hruai an ni a, Philemona (20), Zokhawthar chu a hliam nat zual avangin Aizawla enkawl tura hruai a ni. Mi dang pahnih - Baby (2) d/o Parṭhai, Kawilam leh Nangsuanmang (21), Sialtui khuate chu Champhai District Hospital-ah enkawl zui an ni thung.

Champhaia awm mek Transport minister TJ Lalnuntluanga chuan chetsualna hmun a tlawh bakah, chetsualnaa thi leh hliamte buaipuitu Chhungte Branch YMA hnenah pawisa a pe a; hliamte Champhai District Hospital-ah a tlawh bawk.