G20 meeting Aizawla thlen dan tur sawiho

March 2023-a Aizawla G20 Business Meeting nghah tura inpuahchahna hrang hrang leh ṭul dangte thlirin December 29, Ningani khan Secretariat conference hall-ah sorkar official-te an ṭhukhawm a, chief secretary Dr Renu Sharma-i'n a kaihruai.

Chief Secretary chuan, March 2, 2023-a Aizawla G20 Business Meeting neih tur chu Mizoram tan méllung pawimawh a nih dawn thu a sawi a, "Meeting hi G-20 Secretariat kaihhruaina hnuaiah neih tur a nih avangin ruahmanna hrang hrangte a ṭha thei ang berah tih a ngai dawn a, department hrang hrang kan thawhho leh ṭanho a ngai dawn a ni," a ti.

India chuan G20 president nihna December 1, 2022 khan a chelh ṭan a, kum khat chhung a chelh ang. G20 meeting-te chu India rama khawpui hrang hrang bakah, hmarchhak state khawpuiahte nghah a ni dawn. Kum khat chhungin meeting 200 vel a awm dawn a, Aizawla nghah tur chu sumdawnna lam hawi a ni ang.

G20 meeting inpuahchahna turin Home secretary H Lalengmawia kaihhruaina Core Committee din a ni tawh a, sorkar secratary hrang hrang kaihhruai sub-committee eng emaw zat din a ni bawk.