KHAWTHLIR

TeleMANAS Cell

Rilru leh a kaihhnawih harsatna hrang hrang neite'n an harsatna leh manganna an thlenna tur leh, a ṭul anga hma laksaktu atana din State TeleMANAS Cell chu nimin December 30 khan Health & Medical Education directorate-ah Health principal director Dr T Lalhmangaihi'n a hawng

Minister-in enfiah

Minister Lalruatkima chuan nimin December 30 zing khan a bial chhung Tuikual khelmuala futsal ground-a phùl lem phah dan tur a enfiah. Minister chuan, "Kan CM Pu Zoramthanga kaihhruai sorkar chuan kawng hrang hrangin hmasawnna ruhrel siam kawngah hma a la mek a, ṭhalaite hun âwl hman ṭhatna tur leh talent hai chhuah a, an infiamna tur hmunhmá siam belh mek zel a ni,"a ti.

IGP-ah kai sang

Mizoram Police-a deputy inspector general (headquarters) ni mek Lalbiakthanga Khiangte, IPS chu inspector general (IGP) rank-ah a kai sang.

Morgue van inhlàn

Power Grid Corporation of India (PGCI) chuan corporate social responsibility sum hmanga an lei, mitthi phurhna tur lirthei (morgue van) thar chu Mamit DC hnenah December 29, Ningani khan an hlan. Morgue van hi PGCI chief general manager Balbir Singh-a'n Mamit bawrhsap Lalnunhlua hnenah a hlan a ni.

Ambulance inhlàn

Bharat Alluminium Company Limited, New Delhi chuan corporate social responsibility sum aṭanga an lei ambulance (Magic Express Ambulance) chu nimin December 30 khan YMA, Sub-Hqrs, Lunglei hnenah an hlan. Ambulance hi Rs 10,00,000 senga lei a ni a, inhlanna hun hi Lunglei DC Office tualah hman a ni.