Hàlpuah khapnain zawm a hlawh lo - Aizawlah hàlpuah/hàlmawi an hâl nasa

Mizoram sorkarin halpuah leh halmawi hâl leh meithallàwn chhuahte khap mah se, nizan khan kum hlui 2022 thlahna leh kum thar 2023 lawm nan Aizawl leh khawpui ṭhenkhatah halpuah/halmawi hâl a nasa hle.

Aizawlah chuan zan tir lam aṭangin halpuah ri hriat tur a awm pheuh pheuh a, zan dar 11:30 vel aṭangin hriat tur a tam ṭan a, zan dar 11:45 vel aṭanga zanlai pelh dar 12:30 vel thlengin khawpui chhung veng tam zawkah halpuah/halmawi an hâl nasa hle a ni. Hetih lai hian, meithallàwn erawh hmuh tur a awm meuh lo thung.

Halpuah leh a kaihhnawih thilte chu sorkarin a khap a nih avangin hâl lo turin Home minister Lalchamliana chuan December 30, 2022 khan ngenna thuchah a lo tichhuak tawh a, "Sorkarin a khap thilte hi mipuite'n ti lo tlang ṭheuh ila kan duh tak zet a, ngenna kan siam leh a ni. Hal chak hle mah ila, i insúm hram hram ang u," tiin mipui a ngen a ni.

He thu ziah lai hian police-te'n halpuah/halmawi hâl man an neih leh neih loh hriat theih a la ni lo.