December 2022 chhungin Covid-19 vei mi 10 hmuh a ni; hripui vanga thi awm lo

December 2022 chhung khan Mizoramah swab sample 1,191 endik aṭangin Covid-19 vei mi 10 chiah hmuh chhuah a ni a, June 2020 hnua hripui vei hmuh chhuah tlèm ber thla a ni. Hripui vanga thi an awm lo a, October 2020 hnua hripui vanga thi an awm loh vawi khatna a ni.

Nikum (2022) December thla chhunga sample 1,191 endik aṭanga Covid-19 pisitive hmuh zat 10 chu 0.84% chiah a ni. December thlaa ni 31 zinga ni rukah chiah Covid-19 positive hmuh chhuah a ni a, ni dang 25-ah positive hmuh a ni lo a; positive hmuh hnuhnun ber chu December 12 kha a ni.

December thla chhungin Covid-19 positive enkawl lai mi 18 chhuahtir an ni a, chawlhkar hnih chhung, December 17 aṭangin Mizoramah hripui vei an awm tawh lo.

December thla chhungin Covid-19 vanga thi an awm lo a, Mizoramah kum hnih chuang hnua hripui vanga thi an awm loh vawi khatna a ni. October 2020 thla tawp lam khan Mizoramah Covid-19 vanga thi hmasa ber a thi a, chuta ṭang chuan thla tin thi an awm a, December 2022 kha October 2020 hnua hripui vanga thi an awm loh vawi khatna a ni.

December 31, nimin khan Mizoramah swab sample endik a awm lo a, hripui vei hmuh chhuah a ni lo. Mizoramah sample 19,92,965 endik tawh niin, Covid-19 vei 2,38,964 hmuh a ni tawh a, hripui vei zinga mi 2,38,238 (99.7%) chu dam taka chhuahtir niin, mi 726 (0.3%) an thi tawh a, hripui vei enkawl lai an awm lo.