Covid-19 lèn hnuah kum 2021-ah hripui vei leh thihpui an tam ber

Covid-19 hripui a lèn hnuah kum 2021 khan Covid-19 vei hmuh chhuah leh hripui vanga thi an tam ber a, nikum 2022 khan hmuh chhuah leh thihpui an tlem ber.

IDSP, Mizoram aṭanga thu dawn danin, MIzoramah swab sample 19,92,965 endik tawh zingah Covid-19 positive mi 2,38,964 hmuh chhuah a ni tawh a; mi 2,38,238 (99.7%) chu dam taka chhuakin, mi 726 (0.3%) an thi thung. Tun dinhmunah hripui vei mek an awm lo.

Covid-19 lèn ṭan kum, 2020 chhung khan sample 1,79,810 endik aṭangin hripui vei mi 4,216 hmuh chhuah a ni a, hripui vangin mi pariat an thi a ni.

Kum 2021 chhung khan sample 13,27,398 endik aṭangin Covid-19 positive 1,37,449 hmuh chhuah a ni a, hripui vangin mi 537 an thi.

Nikum 2022 chhung khan samples 4,85,757 endik niin, Covid-19 vei mi 97,299 hmuh chhuah a ni a, hripui vei zinga mi 181 an thi a ni.

Kumin January ni 1 leh ni 2 khan swab sample endik a ni lo a, kum 2023-ah Covid-19 positive hmuh chhuah a la ni lo.