Hàlpuah/hàlmawi kawl leh hâl vangin Police-in mi 38 man; thubuai 35 ziak lut

Hàlpuah leh hàlmawi leh a kaihhnawih dangte Mizoram pumah khap a ni chungin December 31, 2022 zan khan kum hlui 2022 thlah nan leh kum thar 2023 lawm nan Aizawl leh khawpui dang dangah nasa taka hâl a ni a; Aizawlah chuan halpuah kaihhnawihah mi 28 man an ni.

Hàlpuah leh hâlmawi kaihhnawiha mante hi bail-in chhuahtir an ni a; police-te chuan chargesheet an buaipui mek a, an peih hunah court-in an chungthu a ngaihtuah ang.

Mizoram Police DIG Lalbiakthanga Khiangte hnen aṭanga thu dawn danin, Decem­ber 31, 2022 zan khan halpuah/ halmawi kawl vangin police-in mi 16 an man a, thubuai 15 ziah luh a ni.

Aizawl Police Station hnuaiah mi pahnih man niin, thubuai pali ziah luh a ni a; Bawngkawn PS hnuaiah mi pariat man niin, thubuai paruk ziah luh a ni. Kulikawn PS hnuaiah mi pakhat man niin, thubuai pakhat ziah luh a ni a; Vaivakawn PS hnuaiah mi panga man niin, thubuai pali ziah luh a ni bawk.

December 31 zana halpuah/halmawi hàl vangin Aizawlah mi 12 man an ni a, thubuai 11 ziah luh a ni. Aizawl PS hnuaiah halpuah hàl vangin mi pali man niin, thubuai pali ziah luh a ni a; Bawngkawn PS hnuaiah mi paruk man niin, thubuai paruk ziah luh a nih bakah, Vaivakawn PS hnuaiah mi pahnih man niin, thubuai pakhat ziah luh a ni.

Kum hlui thlahna leh kum thar lawm laia halpuah/halmawi kawl leh hàl vanga Aizawl district-a man zawng zawng chu mi 38 an ni a, thubuai 35 ziah luh a ni.

Hetihlai hian, Aizawl khawpui hmun hrang hrangah December 31, 2022 zanah halpuah leh halmawi hal ri hriat tur leh hmuh tur a tam hle.

Kum 2021 kum hlui thlahna leh kum 2022 kum thar lawm zan (December 31, 2021 zan) khan hâlpuah leh hâlmawi hàl khapna thupek zâwm lo mi 26 man an ni a, thubuai 23 ziah luh a ni. Mi mante chu halpuah/halmawi kawltu mi 19 leh hâltu mi pasarih an ni. Thubuai 23 ziah luh zinga 18 chu Court-in thiam loh a chantir tawh a, thubuai panga erawh chu chinfel a la ni lo.