KHAWTHLIR

Pisa kai tan
Nimin kha sorkar pisa kai ṭan ní a ni a, sorkar department hrang hrangte bakah, private office ṭhenkhatte'n pisa kaiin hna an thawk ṭan. Hetih lai hian, sorkar pisate a la tháwl a, pisa la kai lo eng emaw zat an awm. Aizawl khawlai pawh a la tháwl a, traffic jam hmuh tur a awm meuh lo a ni.

YEF-in thisen pe
Kohhran Thianghlim ṭhalai pawl, Youth Evangelical Front chuan December 27-28, 2022 chhung khan Solomona Temple-ah thisen pek rûnpui an huaihawt a, Civil Hospital, Aizawl tan thisen 485 an pe a, petute mipa 323 leh hmeichhia 162 an ni. Kohhran Thianghlim hian December 25-26, 2022 chhung khan Solomona Temple-ah Jerusalem Inkhawmpui an hmang a, Mizoram hmun hrang hrang aṭangin palai ṭhahnem tak an tel a ni.

Step-ah chesualin Pastor a thi
Presbyterian Kohhrana Champhai Bethel bialtu pastor Rev. F Lalrinawma (54) chu nimin chhun dar 11:30 vel khan an awmna quarters chung aṭanga step-a a chhuk tur chu chesualin, step-ah a lum a, a hliam tuar loin a thi. Thu dawn danin, Rev. F Lalrinawma hi in chunga tui a buaipui zo a chhuk leh lamah a chesual a; a nupui leh an fate pahnih a kalsan. A ruang hi an khua Khumtungah nimin khan lâk a ni a, vawiinah vui a ni ang.

Sikul kâng tanpui
Mizoram Independent School Association chuan an member, Ebenezer School, Zemabawk hnenah January 2, Thawhṭanni khan ṭanpuina Rs 16,80,000 an hlan. Ebenezer School hi December 5, 2022 khan a kâng a, ṭanpuina atan MISA member sikul zirtirtute leh zirlaite'n pawisa an thawh khawm a ni.

Mi bo thiin chhar
December 28, 2022 aṭanga chin hriat loha awm Victor Lallawmawma (27) s/o R Lalawmpuia, Lungdai, Kolasib district chu nimin zing dar 9:30 vel khan Lungdai bazara hotel pakhata inthiarna (toilet) chhungah thia hmuh a ni. Thu dawn danin, Victor Lallawmawma hi December 28 aṭang khan a awmna chin hriat a ni lo a, a chhungte leh ṭhenrualte'n an zawng tawh a ni.

Officer kai sang
Mizoram Police-a deputy inspector general (headquarters) ni mek Lalbiakthanga Khiangte, IPS chu inspector general (IGP) rank-ah a kai sâng a, H Ramthlengliana chu DIG rank-ah a kai sang bawk. Hetih lai hian, PWD engineer-in-chief Bowman chu December 2022 thla tàwp khan superanuation pension-in a chàwl a ni.

Pawisa lem man
Champhai police-te chuan tun hnai khan Champhai Zotlangah pawisa lem cheng 500 note 1,705 an man a; inhnamhnawih nia puh mi panga - Laltlanzova (38) s/o Lianthangpuia, Lalnunzauva (25) s/o R Lalrinliana, Lalhriatpuia (27) s/o R Lalrinliana, Lalthangmawia (24) s/o Lalroenga, Rosangzuala (38) s/o Kapzauva, Champhai Zotlang te leh Lalbiaktluanga (48) s/o R Buatsaiha, Lunglei Venglaite an man bawk.