Jail aṭanga tlân chhuak la hmu lo

Central Jail-a táng Lalvenhima (25), Khuangthing, Champhai district, December 27, 2022 zinga jail aṭanga tlân chhuak chu nimin thleng khan man a la ni lo.

Lalvenhima hi Decem­ber 27 zing dar 5:30 vel khan Central Jail aṭangin a tlân chhuak a; jail aṭanga tlân chhuak turin a mutpuan (bedsheet) hmangin jail hungna bangah a láwn liam nia hriat a ni.

Kum tling lo pawng­sual thubuaiah Lalvenhima hi kum 2018 khan man a ni a, December 6, 2022 khan Court-in thiam loh chantirin, kum 20 chhung táng tura hrem a ni.

Lalvenhima hi Central Jail aṭanga a tlân chhuah hnuah police-te'n man tumin an zawng nghal a, nimin thleng kha chuan man a la ni lo nia thu dawn a ni.