December 2022-ah Hripui vanga thi an awm lo

December 2022 chhung khan Mizoramah Covid-19 positive mi 10 chiah hmuh chhuah a ni a, hripui vanga thi an awm lo. Covid-19 hripui a lèn hnuah kum 2021 khan Covid-19 vei hmuh chhuah leh hripui vanga thi an tam ber a, nikum 2022 khan hmuh chhuah leh thihpui an tlem ber.

IDSP, Mizoram aṭanga thu dawn danin, December 2022 chhung khan Mizoramah sample 1,191 endik aṭangin Covid-19 vei mi 10 chiah hmuh a ni a, positivity rate 0.84% niin, June 2020 hnua hripui vei hmuh chhuah tlèm ber thla a ni. Hripui vanga thi an awm lo.

October 2020 thla tàwp lam khan Mizoramah Covid-19 vanga thi hmasa ber a thi a, chuta ṭang chuan thla tin thi an awm a, December 2022 kha October 2020 hnua hripui vanga thi an awm loh vawi khatna a ni.

Nikum December thlaa ni 31 zinga ni rukah chiah Covid-19 positive hmuh chhuah a ni a, ni dang 25-ah positive hmuh a ni lo a; positive hmuh hnuhnun ber chu December 12 kha a ni. December 17, 2022 aṭanga nimin thlengin hripui vei an awm tawh lo bawk.

Mizoramah swab sample 19,92,965 endik tawh zingah Covid-19 vei mi 2,38,964 hmuh chhuah a ni tawh a; mi 2,38,238 (99.7%) chu dam taka chhuakin, mi 726 (0.3%) an thi. Tun dinhmunah hripui vei mek an awm lo.

Covid-19 lèn ṭan kum, 2020 chhung khan sample 1,79,810 endik aṭangin hripui vei mi 4,216 hmuh chhuah a ni a, hripui vangin mi pariat an thi. Kum 2021 chhungin sample 13,27,398 endik aṭangin Covid-19 positive 1,37,449 hmuh a ni a, hripui vangin mi 537 an thi. Nikum 2022 chhung khan sample 4,85,757 endik niin, Covid-19 vei mi 97,299 hmuh a ni a, hripui vei zinga mi 181 an thi a ni.

Kumin January ni 1 leh ni 2 khan swab sample endik a ni lo a, kum 2023-ah Covid-19 positive hmuh chhuah a la ni lo.