Dy CM-in TNT Family Night a hmanpui

Deputy chief minister Tawnluia chuan December 31, 2022 zan khan Thutak Nunpuitu Team (TNT)-in Muanna Venga an hmuna 'Family Night with Christ' an hman a hmanpui a, TNT ṭanpui nan Rs 1,00,000 a pe.

TNT hotute'n an tui lâk an indaih tawh loh thu an sawi chungchangah Deputy Chief Minister chuan, "Tui lâk belhna tur enfiah a ni tawh a, a pawisa pawh tihfel a ni tawh a, kum thar (2023) aṭang chuan hna bul kan ṭan thei tawh dawn a ni," a ti.

Tawnluia chuan, TNT chu Isuaa chhungkaw lian tak an ni tih sawiin, "TNT hi mi dangte tana hna thawktu leh rawngbawltu, mahni inphatsana mi dang tana thawktu a ni a, rualbanlo, fahrah leh awm ṭha duh lo te, ruihhlo ngái te, zu vanga harsatna neite enkawla kuangkuahtu a ni," a ti a; TNT hnathawh chu Pathianin a theihnghilh lo a, a awmpui reng tih a chian thu a sawi.

TNT dintu Sangthankima pawhin thu sawiin, "Kan inkaih-hruainaah Pathian thua inkaihhruaina leh chhandamna kan ngai pawimawh ber a ni," a ti a; Pathianin kum eng emaw zat a hruai tawh a, chaw chhuàn khat pawh an la nghei loh thu a sawi bawk.

TNT, Muanna Vengah hian fahrah, ruihhlo ngai, rualbanlo leh thawktu mi 1,869 an awm mek a ni.