Khawtlangin PHC sak mek an chhu chhia; Sa ṭha turin Excel Consultancy Services an duh

Lawngtlai district-a Bualpui Ng khuaa damdawi-in, primary health centre (PHC) sak mek chu sak dan a chhiat avangin December 27, 2022 khan khawtlang mipuiin an chhu chhia a; sa ṭha turin Excel Consultancy Services an duh thu an tarlang.

Bualpui Ng Joint NGO hruaitute sawi danin, damdawi-in hi cheng nuai 253 sénga sak tur a ni a, February 2022-ah sak ṭan a niin, a satu contractor chu Lalramdinthara, Aizawl lam mi a ni.

Contractor-in hna a thawh ṭan dawnah Bualpui Ng khuaa tlawmngai pawlte'n hna ṭha lo an duh loh thu leh ro tling ni tura sak an duh a, ṭha taka sa turin contractor an hrilh a; an duh ang leh beisei anga hna a thawh loh chuan an tihchhiat tur thu an hrilh lâwk bawk.

December 21, 2022 khan Young Lai Association (YLA) sub-headquarters leh branch ṭhenkhat hruaitute'n Bualpui Ng PHC sak mek chu an enfiah a, hna ṭha tâwk lo lai a awm avangin an lungawi lo. Contractor chu hna thawk chhunzawm rih lo turin an ngen a, mahse, contractor chuan YLA-in stay order an pek theih loh thu PHC-a Medical Officer hnenah an hrilh a, Medical Officer pawhin hna thawk chhunzawm tura a tih angin, hna an thawk chhunzawm a ni.

YLA hruaitute chuan December 24 khan an enfiah leh a, a ṭha lo nia an hriat avangin hna thawktute chu châwl turin an hriattir a ni. An ngenna chu contractor-in a ngaih pawimawh loh avangin December 26 zanah YLA leh pawl hrang hrang hruaitute ṭhukhawm chuan damdawi-in chu a ṭha thei ang bera sak an duh avangin chhut chhiat an rél a, December 27 khan an chhu chhe ta a ni.

Bualpui Ng Joint YLA chuan thuchhuah siamin, an khuaa PHC sak mek an chhut chhiat tâk chu Excel Consultancy Services-in a rang thei ang berin sa se an duh thu an tarlang a, "Mizoram sorkarin duhsak taka cheng nuai 253 sénga PHC building RCC-a sak mek hna enkawl mektu site engineer hi a rang thei ang berin Excel Consultancy Services-in thlâk rawh se... Bualpui Ng khawtlangin hnatlanga kan chhut chhiat hi Excel Consultancy Services-in February 2023 thla ral hma ngeiin hna thawk ṭan leh rawh se," an ti.