SEDP hnuaiah kum 2022-23 chhungin Mi 1,500 mau/rua chìntir tum a ni

MNF Media & Publicity department-in thla 42 (kum thum leh thla ruk) chhunga MNF sorkar hmalakna an tihchhuaha an tarlan danin, SEDP hnuaiah kum 2022-23 atan mi 1,500 mau/rua chìntir tura ruahman a ni.

Kum 2022 tawp lama MNF Media & Publicity department-in thla 42 chhunga MNF sorkar hma-lakna tarlanna lehkhabu an tihchhuahah, kum 2019-20 khan SEDP hnuaiah Lengpui leh Hmunpuiah mi 226 mau/rua chìntir an ni a; kum 2020-21 khan Hmunpui Saiphai zaua ram hectare 150-a zauah hmalak a ni. Kum 2022-23 atan mi 1,500 chu mau/rua chìntir tura ruahman a ni bawk.

Kum 2020-21 aṭangin North Eastern Council (NEC) hnuaiah 'Bamboo Development Project in Mizoram' kalpui ṭan a ni a; Kolasib, Mamit leh Khawzawl district-ahte ram hectare 385-a zauah mau/rua chìntir niin, raw chi tissue culture - D Brandisii leh Rawmi ṭiak (D Sikkimensisi) te chìn tura sem a ni.

Kum 2021-22 chhungin Aizawl, Lunglei, Hnahthial, Mmait, Kolasib, Champhai leh Khawzawl district-ah unit 889 tuamin mau/rua ṭiak sem a ni tawh.

National Bamboo Mission fund aṭangin Bamboo Development Agency hnuaiah mau sâwngbàwlna (bamboo processing factory) din a ni a, agarbatti kuang (stick) siamna unit pakua din a ni tawh. Sairang leh Zuangtui Industrial Estate-ah Bamboo Technology Park din a ni.

Mau sawngbawlna factory-te chu bawlhhlawh ningnáwi awm lo (zero waste) a nih thu leh ningnawite chu bamboo charcoal leh bamboo vinegar siam nan hman tum a nih thu an tarlang bawk.