Zokhua leh Adventure Park hawng

Tourism minister Robert Romawia Royte chuan February 8, Inrinni khan Reiek Tourist Resort-a Zokhua leh Adventure Park a hawng a; zin mite hîpna tura ruahman tur Reiek tlang cheibâwlna hna thawh tur lungphùm a phúm bawk.

Robert Romawia Royte chuan, "Zin mite hîpna hmunpui, ram dang mite hriat hlawh khawpin Reiek hi cheibâwl tum a nia, tourist destination tak taka siam turin sorkar bakah, Reiek khawtlang mipuiah a hlawhtlinna a innghat thui hle," a ti a; sorkarin ruhrel hrang hrang a dinte chu duat turin a chah.

Tourism Minister chuan, Reieka Zokhua chu hun eng emaw chen mipui hman theihin awm tawh mah se, project-in a ken tel thil tam tak siam belh a nih avangin dan ang taka hawn a nih mai loh thu a sawi a; khawvel changkang zelah mipuiin hlimna leh chawlh hahdamna hmun tlawh an uar tial tial tih sawiin, "Chutiang ang dawngsawng thei tur chuan Tourism department inbuatsaih a ngai a, Mizorama hmun mawi kan neihte khualzin hìp nan hman ṭangkai kan thiam a ṭul a ni," a ti.

Zokhua leh Adventure Park hi a project hming chu Development of Adventure and Eco-Tourism at Reiek tih leh, Development of Adventure Theme Park tih a ni a, cheng nuai 1350.37 hmanga siam a ni. Ministry of Tourism hnuaia Swadesh Darshan Scheme hnuaiah October 2017-ah thawh ṭan a ni a, August 25, 2019-ah zawh a ni. Park-ah hian high rope course, zipline, shooting range, climbing wall, tarzanland, spider web, Austrian trolley leh body zorbing-te a awm.

Reiek tlang cheibâwl hna chu North East Special Infrastructure Development Scheme component-I aṭanga hmuh cheng nuai 560 hmanga thawh tur a ni a; kea kalna, lirthei dahna, inthiarna, street light, khaw thlirna, amphitheatre chei ṭhatna, retaining wall leh thil dangte siamna tur a awm.