Mizoramin a luah thin ram Assam-in hectre 1,800 kan la lêt - Himanta; Assam-in ram lâk lêt an nei lo - HM Chama

Assam chief minister Himanta Biswa Sarma chuan an state Assembly session-ah, Assam state-in Mizoram aṭangin ram a chhuh lêt niin tun hnai khan a sawi a; Home minister Lalchamliana erawh chuan Assam-in Mizoram aṭangin ram lâk lêt a neih loh thu a sawi thung.

Himanta Biswa Sarma hian December 20, 2022 khan Assam Assembly House-ah Mizoram aṭangin ram acre 1,800 an lâk lêt thu a sawi a, "He sorkar (Assam sorkar) hian Mizoram lak aṭangin ram acre 1,800 a la lêt thei a ni," a ti.

Assam Chief Minister thusawi chung-changah hian Home Minister Lalcham­liana chuan Vanglaini palai zawhna chhángin, Assam-in Mizoram aṭangin ram chhuh lêt a neih loh thu sawi a, "Mizoram sorkar dinna BEFR 1875 anga a sawi a nih chuan thuhran," a ti a; BEFR 1875-ah chuan Assam luah mek eng emaw zat a awm sa thu a sawi.

Lalchamliana sawi danin, Mizoram ramri chinah Mizoram sorkar chu Bengal Eastern Frontier Regulation (BEFR), 1875-ah a ding reng a; chu chu chinfel tura hmalakna kalpui mek a ni.

Home secretary H Laleng­mawia pawhin Vanglaini palai zawhna chhangin, Assam Chief Minister thusawi chungchang chu an la sawiho loh thu a sawi a, chutih rualin, "Assam sorkarin Mizoram aṭanga ram chhuh lêt an neih kan hre lo. Kan hlâwk zawkin kan hria," a ti.

Hetihlai hian Assam Chief Minister hian kum 2021 July-ah khan Assembly House-a zawhna a chhannaah Barak Valley chhungah Mizoramin Assam ram hectare 1,777.58 an luah thu a lo sawi tawh a; heng ramte hi chhuhsaka Assam thuhnuaia dah tuma ṭan an lak thu pawh a lo sawi lang tawh a ni.

Himanta sawi danin Mizoramin Assam ram an luah zinga hectare 1,000 hi Hailakandi district chhungah a awm a, hectare 400 hi Cachar district chhung niin Karimganj district chhungah hectare 377.58 an luah bawk a ni.