Hâlpuah/ hâlmawi puak lai thlalak hmanga Tourism dept. chibai bûknain sawi a hlawh

Mizoram sorkara Tourism department-in kum thar 2023 chibai bûkna atana an Facebook page-a sorkarin a khap hâlpuah puak lai thlalak leh video an dah chu Central YMA general secretary Prof. Lalnuntluanga chuan fuh lo a tih thu a sawi.

Tourism department chuan Decem­ber 31, 2022 zan zanlai pelh hnu, January 1, 2023 khan an department-in Facebook-a page an siam 'Mizoram Tourism' tihah kum hlui thlah zana hàlpuah/hàlmawi hâl/puak lai thlalak (video) dahin, kum thar 2023 chibai bûkna thu an dah a ni.

Hàlpuah/ hàlmawi leh a kaih­hnawih thilte Mizoram sorkarin a khap mek a nih laia sorkar depart­ment vêkin mipui chibai bûkna atana sorkar thupek bawh­chhiatna thlalak a dah chu mi tam takin an sawisel a ni.

Tourism department-in thlalak an post chungchangah hian CYMA general secretary Prof. Lalnuntluanga chuan Vanglaini palai zawhna chhángin, CYMA ngaihdan sawi thei lo mah se, mimal ngaihdanah chuan Tourism department thil tih dan chu fuh lo a tih thu a sawi.

CYMA General Secretary chuan, Tourism department-in hàlpuah puak lai thlalak/ video an post chung­changah, "A fuh chiah lo chu ka ti. Mahse, pawl angin kan la sawi lo," a ti a; sorkarin halpuah leh a kaih­hnawihte a khap laia kum hlui thlahna leh kum thar lawmna atana hâlpuah hâl chungchang chu CYMA-in an la sawi lo tih sawiin, "Kan la review ang. Kar leh lamah chuan kan ṭhutkhawm ka ring," a ti.

Tourism department chuan 'Mizoram Tourism' tih page-ah kum hlui thlah zana hàlpuah puak lai thlalak (still photo) post in, kum thar chibai bûkna thu an ziak a, "Happy New Year to all of you. May this New Year brings you Joy, Peace and Prosperity. Stay Blessed always!" an ti a ni.

Mizoram Tourism page vêka kum thar chibai bûkna video an dahah pawh, "Aizawl welcomes New Year 2023 HAPPY NEW YEAR," tih ziakin, hàlpuah puak lai video, minute 2 chuanga rei an dah bawk.