Kuhva chíngtute'n tanker-a phurh Kuhva rah an man, an hâl nghal

Bilkhawthlir Kuhva Chingtu Society (BKCS) chuan nimin zing dar 2:30 vel khan tuialhthei phurtu lirthei (oil tanker)-a phurh Myanmar aṭanga kuhva rah tawlh rûk eng emaw zat an man a, kuhva rahte chu la chhuakin an hâl.

Dan loa kuhva rah tawlhin Bilkhawthlir a paltlang lohna turin BKCS chu December 14, 2022 aṭang khan an khaw dái hmun pahnihah an duty a, kuhva phur nia rinhlelh lirtheite an endik ṭhin. BKCS duty-te chuan nimin khan tanker pakhat chu ringhlelin an tiding a, an enfiah hnuah kuhva rah a phur tih an hmu chhuak a ni.

Tanker pindan (compartment) pathumah kuhva rah dah khah vek a ni a, a vaiin ip 150 a ni a; kuhva rahte chu an lak chhuah hnuah nimin chawhnu dar 1:30 vel khan an hâl a ni. Tanker khalhtu chu Aminul Hog s/o Zamal Uddin, Kalain, Assam a ni a, kuhva rahte chu Zabur, Kalain ta a nih thu driver chuan a sawi.

Tanker-ah hian document hmuh tur a awm lo a; registration number MZ-01 C-4265 a inbel bakah, number plate dang pathum MZ-05 4270, TR-01 AJ-1622 leh TR-01 AA-1795 te lirthei chhungah hmuh a ni.