Tuivai luia dan loa balu leh lung lâk titawp turin YEJM-in DM an ngen

Youth for Environment Justice, Mizoram (YEJM) chuan nimin khan Saitual district magistrate/ bawrh­sap hnenah NE Khaw­dungsei rama Tuivai luia BR Goyal Infrastructure company-in dan loa lung leh balu an lâk ṭhin tihtawp a nih theih nan stay order pe turin an ngen.

YEJM hian an con­vener Vanram­chhuangi leh thupuangtu Lalrinfela te hmingin nimin khan Saitual DC hnenah lehkha thehlutin, NE Khaw­dungsei khaw zâwn Tuivai luia lungte chu BR Goyal Infrastructure-in dan loa an lak thu an tarlang a, "I thuneihna hmanga a rang thei ang bera stay order pe turin kan ngen tak meuh meuh che a ni," an ti a; Tuivai luia balu leh lung an la lai thlalak eng emaw zat an thil tel a ni.

NE Khawdungsei ram chhunga Tuivai luia balu leh lung la turin NE Khawdungsei VC leh BR Goyal Infrastructure hotute'n inremna an siam nia sawiin YEJM chuan, "Phalna pe tur hian VC-te’n thuneihna an neih loh mai bakah, environment/forest clearance an neih hriat a ni lo. Hna thawktu BR Goyal Infrastructure hian Mizoram Minor Concession Rule, 2000 Section 13 an zâwm lo tih hriat a ni," an ti.

National Green Tribunal-in March 2021-a Enforcement and Monitoring Guidelines for Sand Mining 2020 leh Sand Mining Framework 2018 clause 1.2.8.1 a siamte chu zawm turin India rama state leh union territory-te khauh taka thu a pek chu an zâwm lo vek tih an tarlang bawk.

YEJM chuan, Tuivai lui chu riverine reserve forest huam chhung a ni tih sawiin, "Luia balu leh lung an lâkna hi endik a ni a, lui chu a mám purh a, luia nungchate tan dam khawchhuah ngaihna a awm tawh lo. Ram leilung fa, khawtual mite tan luia nungcha hmanga eizawnna leh kût sa zawn tur pawh a awm tawh lo. Environment thlirna aṭang phei chuan lui balu leh lung lak hi thil rapthlak tàwpkhâwk a ni a, dan pawhin khauh takin a khap reng a ni," an ti.