KHAWTHLIR

PC-in lawmawm ti
Peoples Conference party chuan thuchhuah siamin, kum 2022 Krismas leh kum thar 2023 tluang taka buaina leh harsatna lian tham awm loa Mizoram puma lawm a ni chu lawmawm an tih thu an tarlang a, "Mizoram Police thawhrimna te, kohhran leh pawl hrang hrang ṭhahnemngaihna te, thuthar lakhawmtute'n muanawm taka Krismas leh kum thar kan hman theihna tura theihtawp chhuaha an hmalaknate kan chhuang tak zet a ni," an ti. PC party hian Mizo zawng zawngte kum 2023 chibai an bûk bawk.

Ventilator hlân
Minister Lalruatkima chuan nimin khan Ebenezer Hospital Center hnenah Formosa Foundation kaltlanga hmuh ventilator a hlan. Minister hian Ebenezer Medical Center medical superintendent Dr Vanlalsiama hnenah ventilator a hlan a, thu sawiin, "Ebenezer Hospital-in mipui rawng an bàwlna atana hmanraw ṭangkai tak a nih ngei ka beisei," a ti.

Tel turin CM sáwm
Chief minister Zoramthanga chu a pisaah nimin khan Odisha sorkara School & Mass Education minister Samir Ranjan Dash-a'n a kâwm a, January 13-29, 2023 chhunga Odisha-a khawpui pahnih - Bhunaneswar leh Rourkela-a Men's FIH Hockey World Cup neih turah tel turin CM Zoramthanga a sáwm a ni.

Sahuan hawng
Aizawl Zoological Park (Aizawl Sahuan) chu nimin aṭang khan mipui tlawh theiha hawn leh ṭan a ni a; chawlhkar tin Thawhṭanni aṭanga Inrinni thleng hawn tur niin, Pathianniah erawh chuan khâr ṭhin a ni ang.

DC-in kawm
Kolasib bawrhsap John LT Sanga chuan nimin khan Bilkhawthlir leh Vairengte khuaa khawtlang leh kohhran hruaitute a kâwm. Krismas leh kum thar lawmnaa hun hman dan an thlir lêt a, mipui himna tura dan leh thupek kenkawhna kalpui dan leh khawtlang nuam siam nana thawhho dan turte an sawiho. Bawrhsap hian Bilkhawthlir leh Vairengtea sorkar pisa hrang hrang a tlawh bakah, ramri hnaiha checkgate-te a tlawh bawk.