Bangladesh buaina avanga harsatna tawkte Mizorama luhtir phal turin MP-in ngen

Rajya Sabha MP K Vanlalvena chuan nimin khan Union Home minister Amit Shah leh Union Home Secretary hnenah lehkhathawnin, Bangladesh buaina avanga Mizorama rawn luh tum Zohnahthlakte'n harsatna an neih loh nan hmala turin a ngen.

K Vanlalvena chuan, Bangladesh sipaite leh Chin-Kuki sipaite inkahna avangin Chittagong Hills Tract-a tribal mi civilian-te'n harsatna an tawh thu tarlangin, "Zohnahthlak tam tak chu himna zawngin Mizoramah an rawn lut a ni. Mizoram sorkar chuan tlawmngai pawlte nen ṭang tlangin an tan theihtawp a chhuah a ni," a ti.

Mi tam tak Mizoramah an rawn luh tawh lai hian mi ṭhahnem tak, nausen hnute hnelaite thlengin Mizorama rawn luh tum ṭhahnem tak an la awm tih tarlangin K Vanlalvena chuan, "Heng mite hi Border Security Force-ten an rawn luh an phal lo a ni," a ti a, BSF-te'n an dan chhan chu Ministry of Home Affairs aṭanga luhtir tura thupek an dawn loh vang a nih thu a tarlang tel.

Rajya Sabha MP tarlan danin, kum 1970-a Bangladesh-a Kaptai Dam siam a nih ṭumin, Bangladesh Chakma sang tam tak chu Mizoram leh Arunachal Pradesh-ah an himna zawnga khawsak tir phal an ni.

K Vanlalvena chuan a tlai hma ngeia hmala turin Union Home Minister leh Secretary hi ngenin, "Tun ang hun harsaah kan Mizo unaute Mizorama rawn luh phal an ni lo bik a nih chuan in enhranna nasa tak a nih bakah, mihring mihrinnaah pawh thil tih âwm lo tak a ni," a ti.