Zokhawthar maxicab chesuala hliam nautê Civil Hospital ICU-ah enkawl

Mi panga thihna, December 30, 2022 zing khawvar hmaa Champhai Chhungte daia maxicab chesuala hliam zinga mi naute kum 1 leh thla 3 vel mi chu a dinhmun a ṭhat vak loh avangin January 3, Thawhlehni khan Civil Hospital, Aizawlah dah luh niin, intensive care unit (ICU)-ah enkawl a ni.

Tarlan tawh angin, December 30 zing dar 4:30 vel khan Zokhawthar-Aizawl maxicab (MZ-01G-6395), Zokhawthar pana tlân chu Champhai Chhungte dáiah chesualin, khàm sáng takah a tla a; mi pariat chuang zinga panga an thi a, mi dang pathum an hliam a ni.

Lirtheiah hian hmeichhe pakhat leh a fanu naute kum 2 vel mi an tel a, mi dang zawng chu mipa an ni a; chetsualna hmunah mi pali an thi a, lirthei khalhtu Lallunghnema (36), Melbuk chu Champhai District Hospital thlenpui a nih hnu lawkah a thi bawk.

Mi dang pathum hliamte chu damdawi-inah hruai an ni a, Philemona (20), Zokhawthar chu a hliam a nat zual avangin Aizawla enkawl tura hruai nghal a ni. Mi dang pahnih - Esther Lalmuankimi, Kawilam khua leh Nangsuanmang (21), Sialtui khuate chu Champhai District Hospital-ah enkawl zui an ni thung.

Chetsualnaa thi zinga mi Parṭhai fanu Esther Lalmuankimi chu a dinhmun a ṭhat vak loh avangin January 3 chawhnu lam khan Champhai aṭangin helicopter hmangin Aizawl panpui a ni a; Civil Hospital Aizawlah luhpui nghal niin, a dinhmun a ṭhat loh avangin naupang ICU-ah enkawl nghal a ni.