Kum 10-17 inkar lehkha zir lo zingah zûk leh hmuam ti leh zu in an tam

Social Welfare & Tribal Affairs department hnuaia Mizoram Social Defence & Rehabilitation Board (MSDRB)-in naupang leh tleirawl kum 10-17 inkara ruihhlo hman sual chungchang an zirchianna, 'Survey Report on Drugs and Children in Mizoram 2022' -a a lan danin, kum 10-17 inkar lehkha zir tawh lo mi 1,420 zirchian zingah zûk leh hmuam leh zu ni tina ti ṭhin mi 1,248 an awm a, 87.89% a tling.

MSDRB hian zirna chhunzawm tawh lo naupang leh tleirawl 1,420-te data hi Aizawl, Siaha, Champhai, Kolasib, Serchhip, Lawngtlai leh Mamit district hmun hrang hrang aṭangin an la khawm a ni.

Kum 10-17 inkar naupang leh tleirawl 1,420 zinga mi 407 chu chhungkaw harsat vanga zirna chhunzawm thei lo an ni a, chutih laiin, mi 380 chu an zirlaia result ṭha neih loh vanga zir chhunzawm lo an ni. Sikula an zirlai harsa tih vanga chhunzawm lo mi 285, ruihhlo tih ṭhin vanga hnawh chhuah mi 49 leh nungchang mawi loh vanga hnawh chhuah mi 45 leh, sikula inziak lut (admit) lo hrim hrim mi 26 an awm a; chhan dang vanga lehkha zir lo leh zir chhunzawm lo an awm bawk.

Mi 1,420 zinga mi 20 chu nupui/pasal ṭhen tawh an ni a, innei si loa kawppuite nena cheng dun 21 an awm a, dan anga innei pakhat leh dan anga awm hrang pali an awm.

Naupang leh tleirawl zingah hian ni tin deuh thawa ruihhlo tih ngai eng emaw zat an awm a; ni tina zûk leh hmuam ti mi 1,175, zu in mi 73, heroin ti mi 70, opium ti pathum, ganja zu mi 115, sedative mi 63, opiods mi 62 leh inhalant mi 24 an awm.

Zirchianna aṭanga ruihhlo an tih chhan langsar zualte chu - hlimhlawp bàwlna atan te, rilru hahna chhâwk zângkhai nan te, hahdamna leh muthilh theihna nia hriat vangte a ni.